Coop57 Galicia nace nun contexto xeral no que, nos últimos anos, moitas persoas e colectivos sociais están a cuestionar o emprego, nomeadamente polo sistema financeiro convencional, dos cartos da cidadanía en xeral, e dos seus en particular, como ferramenta de acumulación de poder económico e social, e que desvincula a actividade económica de parámetros éticos como a defensa da paz, a loita contra explotación humana, a democracia participativa, a igualdade de oportunidades, a solidariedade e a defensa do medio ambiente. É dicir, o investimento dos cartos en proxectos con rendabilidade económica mais violadores dos dereitos humanos e/ou dos ecosistemas.
Por outro lado, organizacións e colectivos sociais enmarcadas dentro da economía social e solidaria - que teñen como principio fundamental a primacía das persoas sobre o capital na toma de decisións e nas súas políticas, e que promoven valores como a voluntariedade; a democracia participativa; a responsabilidade; a equidade; a vocación social e ambiental; a igualdade; a transparencia e a solidariedade -, fican excluidas dos circuitos financeiros pola súa natureza organizativa; polo perfil socioeconómico das persoas que fan parte delas; e pola natureza dos proxectos que pretenden desenvolver ao non resultaren atractivas para o sistema financeiro convencional.
Con estes antecedentes, téñense promovido no marco europeo diversas iniciativas so un modelo organizativo de democracia participativa, que procuran fomentar o aforro solidario e o investimento ético para financiar proxectos de desenvolvemento local e de cooperación co Sul, con alto valor social e ecolóxico; non especulativos e, daquela, que procuran a recuperación do protagonismo da cidadanía na captación, xestión e aplicación dos cartos, e a compatibilización do rendemento ético e o rendemento económico dos proxectos que son financiados. Exemplos destacados destas iniciativas son a cooperativa de crédito italiana Banca Popolare Etica (BpE) e no Estado Español, Fiare e a cooperativa catalá de servizos financeiros Coop57.
Na Galiza, nomedamente nos primeiros anos do novo milénio, intensifícase o interese sobre as finanzas éticas por parte de diversos colectivos da economía social e solidaria, por exemplo, asociacións e cooperativas no ámbitos do comercio xusto, o consumo responsábel, a cooperación para o desenvolvemento, e a inserción laboral, entre outros, que dá lugar á organización de diversas actividades sobre esta temática e ao xurdimento dunha iniciativa de aforro e investimento solidario de ámbito local.
No desenvolvemento destas actividades coincídese no diagnóstico da problemática para a consecución de financiamento acaído no sistema financeiro convencional por parte das organizacións de economía social e solidaria galegas ; o papel dos cartos na sociedade actual, a súa captación, xestión e aplicación por parte das entidades financeiras convencionais; e a necesidade de procurar alternativas desde o tecido social galego para abordar esta diagnose, através do coñecemento de boas prácticas neste eido de outros territorios do Estado Español, dada a práctica inexistencia de referentes neste eido no territorio galego.
Con estes antecedentes, en 2007 desde as asociacións de cooperativas de traballo e consumo galegas promóvese un programa plurianual para conformar un grupo promotor que dinamice un proceso de reflexión que desemboque na creación dun proxecto de finanzas éticas alicerzado nos principios da economía social, e de ámbito galego. Neste proceso amosan interese en participaren unhas trinta e cinco organizacións dos ámbitos expostos no parágrafo anterior. O período constituinte desenvólvese cunha participación activa dunhas vinte e cinco organizacións, que durante ano e medio estudan, debaten e acordan os contidos do modelo de organización a promover, e realizan actividades divulgativas para o coñecemento de experiéncias activas acordes con este modelo. O resultado deste proceso é a creación de Coop57 Galicia como Sección Territorial da cooperativa catalá de servizos financeiros éticos e solidarios Coop57 por parte de dezaseis delas, sen prexuízo de que outras das participantes se incorporen nun futuro próximo ou teñan apostado, de forma lexítima, por outras alternativas complementarias.
Por parte do grupo promotor de Coop57 Galicia, a aposta por Coop57 responde a:
1) Ponsiderar a esta cooperativa como un referente consolidado no ámbito das finanzas éticas, tendo en conta a deficiencia de iniciativas deste tipo e do saber facer neste ámbito no noso país
2) Polos princípios nos que fundamenta a súa actuación (cooperativos e da banca ética)
3) Polo seu modelo organizativo participativo e de crecemento en rede e solidariedade interterritorial
4) Pola autonomía de xestión e decisión dos proxectos a financiar por parte da Sección Territorial
5) Por ser unha garantía da viabilidade económica da iniciativa en Galiza a respecto de cubrir os posíbeis deficits que se produzan entre a capacidade de captación de aforro e as necesidades de financiamento dos proxectos galegos, e favorecer a sinerxia de custos de estrutura
6) Pola oferta e flexibilidade dos servizos financeiros adaptábeis ás necesidades dos proxectos a financiar en Galiza.
Todo o anterior sendo conscientes das limitacións coas que conta, xa que non podemos falar dunha entidade bancaria en sentido estricto, ao non prestar servizos financeiros a particulares, e que existan operacións de financiamento a proxectos que non poida asumir na súa totalidade. Para cubrir estas limitacións Coop57 fai parte como socia transversal do proxecto de banca ética Fiare SL, e coopera co obxecto de captar capital e depósitos para a constitución dunha cooperativa europea de crédito, xunto coas cooperativas de crédito BpE da Italia e NEF da Franza, no limiar de 2011.
Desde Coop57 Galicia acreditamos que Coop57 vai ser un piar fundamental para a a consecución deste proxecto e daquela dun proxecto integral de Banca Etica no Estado Español, so un modelo organizativo democrático e participativo, e coa nosa integración queremos reforzar a súa consolidación.
Consumo Consciente Árbore, Sociedade Cooperativa Galega.
